Dette er ei lita biletbok med sjel. Eit pinnsvin i lyseraud kjole sit einsam på kjøkenet og ønskjer at nokon skal kome på besøk. Det er ikkje morosamt å vere berre ein. Men snart kjem den eine etter den andre inn døra, og kjøkenet fylles med vener. Dei fleste har me høyrt om før i klokkeboka "Tikk,takk" , men nokre av figurane er nye. Kvart oppslag introduserer ein ny gjest i tekst og bilete, og inviterer lesaren til å telje med frå ein til ti. Teksten er skriven på rim og handlar om entreen til gjestene. Dei fargeglade bileta er haldne i ein naivistisk stil og viser små hendingar som ikkje vert kommentert i teksten. Til dømes har onkel Knut ein blome med seg når han kjem, Grisegutens yre glede synes å skremme nokre av gjestene og den venlege elefanten tilbyr frosken generøst ein kjeks. På denne måten oppmuntrar boka lesaren til å dikte med på fleire plan. Resultatet er ei særprega og sjarmerande biletbok for dei minste. Samlaget, 1999. [26] s., kol.ill. Overs.: Marit Tusvik. Orig.tit.: Lilla Kotten får besök.
